文章

澳門成購物天堂三大條件

澳門要成為遊客心目中的購物天堂,必須從信心、選擇及體驗三方面作出提升。

2020年 01月 21日

澳門發展零售可以話係得天獨厚,贏在起跑線,每年數千萬旅客,零消費稅 (除茶煙酒及燃料) 加上獨特旅遊資源 – 博彩,推動零售理應得心應手。但回望過去 (2013-2017年),本地甲級零售面積增長近50%,唯同期總零售銷售額只上升不超過30%。

原因有兩個,一係新開商場無人行,一係新增的面積展現競食效應。前者的原因係無賣點,後者的成因係新舊商場的針對客群無異,兩者的共通點都係無刺激新需求。

澳門要成為遊客心目中的購物天堂,起碼有三件事要做得比現在更好:

  1. 信心 – 首要針對旅客,保障佢地喺澳門買的都係正版正貨。另一方面,針對營商環境,本澳須大幅提升各行政效率 (如設立公司、裝修准照審批及牌照申請),畢竟現在處理以上事宜動輒6-9個月,加上本地人力資源短缺,實不利行業發展。

  2.  選擇 – 身邊不少朋友都投訴澳門的零售及餐飲選擇少,要消費都傾向去香港及珠海。但筆者認為問題核心在本澳的大部分業主對新興的零售概念及品牌反應較慢,而租約及相關配套欠缺彈性,加上繁複的政府審批程序,令所有在澳發生的都慢三拍,造成選擇少的錯覺。

  3. 體驗 – 以往打開門就有生意,但現在大豪客掃貨的情景已經買少見少,而佢地亦變得比以往更成熟,雖然未必個個精打細算,但肯定更著重體驗。面對網購,政府、業主及零售商應多思考「線上不可能」的體驗,以吸引客戶在澳門消費。